رشيد جوبير تامسنا
وقتاش
تجي عيني في عينك
وتعرفي. شحال تنبغيك
أنا ليك محبة مدگوك
سفيني سفوف شهوة
شربيني نافع جغمة جغمة دوا ؤ نشوة
جرجفيني مطبوخة.
لشفايفك سواك. لمروة
خوديني و دييني
من تخميمة لتخميمة بلا قسوة
خليني انتيه في دروب اهواك
راني. بلساني گريت
احياني بحبك التكويت
مگواني بيك اشكيت
من حر العطفة لله شكوى
هزيت كفوفي وشقوفي ؤ من تهراسي تلميت
وحلفت بحلوفي حتى الدوقي
وتشوفي
وتحسي اللي بيه انا حسيت
قلبي من ليعتو فيك رام لهوى
يا مليح نسوة
غير تعالي تعالي وكلامك هو لكبير
غير تعالي يا غزالي وأنا انوريك اش
ندير
ناس تهديك وردة
وأنا نهديك جردة
مزرضة مقبطة
ا من كل مشموم خلطة
من طيب الروح اتفوح برضى ليك
فراش و غطا
لله قلبك ايحن
يرضى محد العطفة شادة
والقلب فيه لمحبة لابدة
وليعت لغرام امصهدة الكبدة
طايبة شهدة واجد
وقتاش اتلاقينا ليام
اتقبلي على اهبالي ؤ نقبل على هبالك
ياك الحب جنون
ونعيشو لغرام. حقيقة
ماشي طنيز في تيلفون
انصيرو جوج في واحد
شي الساكن ؤ شي بيه المسكون
وقتاش تلاقينا ليام
و تسمعي اش دواني
و لساني بالصدق مطرون
ونگول ليك شلا من كلام
باقي ف الگاشوش ليك مخزون
رشيد جبير
ليست هناك تعليقات:
إرسال تعليق